ЖАҢА ОҚУ ЖЫЛЫНА ДАЙЫНДЫҚ ЖҰМЫСТАРЫ ЖҮРГІЗІЛУДЕ
Сырым ауданының білім беру ұйымдарында 2026–2027 оқу жылына дайындық жұмыстары бекітілген жоспарға сәйкес жүргізілуде.
Жаңа оқу жылында білім алушыларды қажетті оқу-әдістемелік құралдармен қамтамасыз ету бағытындағы жұмыстар кезең-кезеңімен жүзеге асырылуда. 📖✅
📦 2026–2027 оқу жылына сатып алынған оқулықтар аудан орталығына уақтылы жеткізіліп, тасымалдаушыдан белгіленген тәртіппен қабылданып алынды.
Сонымен қатар, мектепке дейінгі ұйымдардың 2+, 3+, 4+ топтарына арналған оқу-әдістемелік құралдар, мектепалды даярлық сыныптары мен 1-сынып оқушыларына арналған дәптерлер жеткізілді.
📕 Атап айтқанда, 3-сыныпқа арналған «Қазақ тілі», «Әдебиеттік оқу» оқулықтары («Атамұра» баспасы), «Математика», «Дүниетану», «Музыка» оқулықтары («Алматыкітап» баспасы), сондай-ақ 7-сыныпқа арналған «Дүние жүзі тарихы» оқулығы («Мектеп» баспасы) алынды.
🚚 Жеткізілген оқулықтар мен оқу-әдістемелік құралдар белгіленген тәртіппен білім беру ұйымдарына таратылуда.
🎒 Жаңа оқу жылы басталғанға дейін оқушыларды қажетті оқулықтармен толық қамтамасыз ету жұмыстары аяқталатын болады.
Барша білім алушыларға сәтті оқу жылын тілейміз! 💐
