Қазақстанда екі жыл ішінде 54 жаңа кен орны ашылды
Қазақстан Үкіметі жер қойнауын геологиялық зерттеу жүйесін жаңғырту жұмыстарын жалғастыруда. Мемлекет басшысы Қасым-Жомарт Тоқаевтың жыл сайынғы Жолдауларында белгіленген тапсырмаларды орындау бағыттарының бірі – геологиялық барлау жұмыстарының тиімділігін арттыру, цифрлық құралдарды дамыту және минералдық-шикізат базасын ұтымды пайдалануға жағдай жасау. Бұл туралы Primeminister.kz хабарлайды.
1:50 000 масштабындағы 20 геологиялық түсірілім жобасы: геологиялық барлау зерттеулердің нақтылығын арттырады
Қазақстан аумағының геологиялық зерттелу деңгейін арттыру негізгі міндеттердің бірі болып қала береді. Жұмыстар 1:200 000 масштабында жүргізіліп, елдің минералдық-шикізат әлеуетінің тұтас көрінісін қалыптастыруға бағытталған.
Бүгінде Қазақстан аумағының осы масштабтағы геологиялық-геофизикалық зерттелу көлемі шамамен 2,04 млн км² құрайды. 2026 жылы бұл көрсеткішті 2,2 млн км²-ге дейін жеткізу жоспарланып отыр.
Сонымен қатар сала 1:50 000 масштабындағы неғұрлым егжей-тегжейлі геологиялық түсірілімге көшуде. Биыл пайдалы қазбалардың перспективалы учаскелерін анықтауға бағытталған 20 жобаны іске асыру басталды. Осы жұмыстар аясында геологиялық зерттеулер жүргізілетін аумақтың жалпы көлемі 100 мың км² болады.
Зерттеулер алтын, мыс, полиметалдар, сирек және сирек жер металдары, литий, вольфрам және молибден кендерін анықтауға перспективалы аумақтарға шоғырланған. Жұмыстар барысында аэрогеофизикалық және геохимиялық әдістер, Жерді қашықтан зондтау деректері, сондай-ақ заманауи зертханалық талдау әдістері қолданылады.
Мұндай тәсіл жалпы карталаудан нақты перспективалы учаскелерді іздеуге басымдық беруге мүмкіндік береді. Мемлекет үшін бұл минералдық-шикізат әлеуетін дәлірек бағалауды білдірсе, инвесторлар үшін одан әрі зерттеу мен игеруге қызығушылық тудыруы мүмкін аумақтар туралы неғұрлым жүйеленген ақпарат алуға мүмкіндік береді.
10 мың кен орны және жаңа қорлар: геологиялық барлау минералдық-шикізат базасын кеңейтуде
Соңғы екі жылда жүргізілген геологиялық барлау жұмыстарының нәтижесінде еліміздің минералдық-шикізат базасын кеңейту жалғасты.
2024 жылы мемлекеттік есепке алғаш рет 35 кен орны қойылды. Оның ішінде 23-і – қатты пайдалы қазбалар, 6-ы – көмірсутек шикізаты және 6-ы – жерасты сулары кен орындары.
2025 жылы мемлекеттік есепке 19 жаңа кен орны қойылды: 17-сі – қатты пайдалы қазбалар кен орны, біреуі – көмірсутек шикізаты және біреуі – жерасты суы кен орны.
Осылайша, 2024–2025 жылдары Қазақстанда мемлекеттік есепке барлығы 54 жаңа кен орны қойылды.